Lun, 15/10/2012
- O xerente da S.A. de Xestión do Plan Xacobeo, José Paz Gestoso, deu esta mañá unha rolda de prensa para presentar os eventos organizados polo xacobeo con motivo da celebración das vodas de prata da Ruta Xacobea como Itinerario Cultural de Europa
- Entre os actos organizados con tal motivo figuran a apertura dunha exposición titulada Memoria de Peregrinación que se poderá visitar no Museo das Peregrinacións e de Santiago; a proxección gratuíta do filme ‘The Way’ no Salón Teatro e mais a celebración dunha mesa redonda na que participará o Comité Internacional de Expertos do Camiño de Santiago, cuxos membros pronunciarán relatorios sobre a evolución do Camiño nestes cinco lustros
- O Comité Internacional de Expertos reunirase tamén con Penelope Denu, a directora do Instituto Europeo de Itinerarios Culturais, con sede en Luxemburgo, que visitará Santiago con motivo desta celebración e que é a responsable do cumprimento da normativa europea nas rutas culturais